Biblioteko

Bonvenon en la Esperanto-Muzeo, kultura entrepreno kaj organiza parto de Ĉeĥa Esperanto-Asocio, kiu estiĝis dank' al kunlaboro inter la urbo Svitavy, Urba Muzeo kaj Galerio Svitavy, Ĉeĥa Esperanto-Asocio kaj la loka Klubo de geamikoj de Esperanto.

La muzeo estis solene inaŭgurita la 20-an de septembro 2008. Ĝi situas en teretaĝo de la romantisma Domo de Ottendorfer, situanta rande de la ĉefplaco, kaj ĝian ekeston grave finance subtenis Muzeo pri kulturo de Ĉeĥa respubliko, ĈEA, la urbo Svitavy kaj la fondaĵo Esperantic Studies Foundation (Usono). La domo estas posedaĵo de la urbo, prizorgata de la Urba muzeo kaj galerio kaj Esperanto-muzeo estas tie en senpaga luo. Granda parto de la interna ekipaĵo estas posedaĵo de Ĉeĥa Esperanto-Asocio.

La ĉefaj celoj kaj aktivecoj de la muzeo estas arigi, katalogigi, prilabori, konservi kaj alirebligi al la vasta publiko kaj la tutmonda esperantistaro informojn kaj kolektmaterialojn pri Esperanto, pri ĝia historio kaj bezonateco kaj utiligeblecoj en la nuna mondo, okazigi portempajn temajn ekspoziciojn kaj kulturajn kaj klerigajn aranĝojn. La muzeo prilaboras kaj alirebligas Esperanto-bibliotekon kaj arkivon kaj vendas Esperanto-librojn.

La lastaj antaŭaj ekspozicioj, pri kiuj ni ofertas al vi fotogaleriojn, nomiĝis: Esperanto kaj kolektado (2014/15), Esperanto kaj muzoj (2013/14), 125 jaroj de Esperanto (2012/2013), Spiritaj tradicioj de la mondo kaj Esperanto (2011/12).

La la 26-an de septembro 2015 okazis inaŭguro de la nova temo KUN ESPERANTO ĈIRKAŬ LA MONDOAlternativaj formoj de vojaĝado kaj de ekkonado de fremdaj landoj kaj kulturoj (apartan fotogalerion el la inaŭgura programo vidu ĉi-tie).

Krom informpaneloj kaj librovitrinoj por vizitantoj disponeblas ankaŭ multmediaj dokumentoj en la muzea komputilo kaj sur la interaga tuŝekrano. La muzeo viziteblas tutjare, pli detalaj informoj troviĝas en la rubriko Kontakto.

Ekde oktobro 2011 la muzeo estas ankaŭ oficiala sidejo de Ĉeĥa Esperanto-Asocio. Tamen en la ejo troviĝas neniu ĈEA-oficejo.

La urbo Svitavy situas fakte en centro de Ĉeĥio, en milda kaj turisme alloga regiono de Bohemia-moravia limlando, kiu estas de ĉiuj direktoj facile trafike atingebla. Ĝi estas i.a. naskiĝloko de Oskar Schindler, fama savinto de judoj dum la dua mondmilito, kun kies vivo vi povas konatiĝi en la urba muzeo. La urbo havas sendube multon interesan por proponi dum via restado. Pli detale vi povas informiĝi en la oficiala retpaĝaro, kiu funkcias ankaŭ esperantlingve. Vizitindas nepre ankaŭ pitoreska renesanca urbo Litomyšl, troviĝanta sur la UNESKO-listo, kaj aliaj vidindaĵoj.

Ni do elkore invitas vin veni por konvinkiĝi kaj malkovri ne nur la muzeon mem, sed ankaŭ la urbon kaj ĝian ĉarman ĉirkaŭaĵon kaj amikiĝi kun la lokaj esperantistoj!

Vian viziton sincere ĝojatendas Muzea grupo de ĈEA

(KONTAKTO: muzeo (heliko) esperanto.cz)


Soubory
jpg Muzeo_prospekto1.jpg (846.61 kB)
jpg Muzeo_prospekto.2.jpg (1011.71 kB)
pdf Starto_2008 - eksterordinara_ muzea_numero.pdf (1.3 MB)